Martxoak 14 - 22:00 -Gazteleku - Oñati - 5 euro
	Houston Party diskoetxeak 5 urte bete ditu eta hori ospatzeko zer pentsatuko eta Joe Pernice sortzaile eta nekaezina buru duen Pernice Brothers taldearen bira antolatzea bururatu zaie. Scud Mountain Boys, Chappaquiddick Skyline eta Big Tobacco taldeetan egin duen lanak une benetan atseginak biziarazi dizkigu mundu zabaleko pop, country eta folkzale guztioi. Lehendik ere bagenekien Joe Pernicek berebiziko erraztasuna daukala abestiak idazteko baina urtea joan urtea etorri oraindik ere zur eta lur uzten gaitu bere kantuak entzutean. Horiek bai kantuak, horiek! Orain azken diskoa noiz aterako zain gaude, aurtengo udaberrian plazaratuko omen da, baina bitartean badugu zer entzun. Bere azken lana ikusgarria da benetan, izan ere, The World Won¹t End pop abesti perfektua bilatzeko bidean ikaragarrizko aurrerapausoa da, sekulakoa; bidaia horretan Teenage Fanclub eta Matthew Sweet izan ditu lagun, besteak beste, eta Big Star, Brian Wilson eta George Harrisonen arrastoari jarraitu dio, country eta folk eraginak beste maila batean utzita. Diskoaren lehen abestia "Working Girls" zoragarria da; gero "7:30" pa-pa-pa eta "Bryte Side" harribitxia datoz, eta ondo baino hobeto bukatzeko "Cronulla Breakdown" dugu, emozioak pil-pilean jartzen dituen horietakoa, Ipar Amerikako negu latzetik desiratzen den uda gogorarazten diguten doinu gozoak lagun. Pernice Brothers taldeak beste inork baino hobeto garbitzen du pop musika baina zerbait hobea aurkitzen baduzu... gozatu horrekin ere.