THE BASSHOLES estatubatuar bikotea, bata gitarrarekin bestea bateriarekin. Blue punk doinuak eskainiko dizkigute eta inoiz musika-keinu maltzurrak antzemango dizkiegu, edonoren arreta pizteko modukoak.
Disko-etxe onenetan ibili dira (In The Red, Revenant, SFTRI) eta beren azken diskoa aurkeztera datoz, zale askoren iritziz orain arteko onena. Don Howland eta Lamont Thomasek osatzen dute taldea eta raw blues, garage eta rockaren nahasketa oso pertsonala erakutsiko digute. Disko horretako hamalau gaiak harribitxiak dira: bluesak dira batzuk (Blackbird, Hell’s Angels, Fascist Times), rock joerakoak beste batzuk (Purple Noon) eta beste batzuen bertsio oso ondo hautatuak beste zenbait (Caravan Man: Lew Lewis; Broke Down Engine: Blind Willie McTell), eta interpretatzeko era oso natural, berezko eta uztartu bat nabarmentzen zaie guztietan.

JEFF EVANS rock & rolleko izar bat da, Estatu Batuen Hegoaldea sortua. Eginkizun askotako gizona dugu: 68 Comeback ahaztezinean jo du eta Gibson Bros taldekoa izan da Jon Spencer eta Bassholes taldeko gure kideekin batera. Gaur egun orkestra gizona dugu.