II. ERANSKINA

• Diru laguntza ebaluatzeko eta kopurua finkatzeko irizpideak

GAZTEEN ELKARTE ETA ENTITATEEK ERABILTZEN DITUZTEN LOKALAK HOBETU ETA HAIEN JARDUERA ERRAZTEARREN, EKIPAMENDU INBENTARIAGARRIA EROSI EDO AZPIEGITURA OBRAK EGITEKO DIRU LAGUNTZAK

• 1.-Xedea

  • Gazteen elkarte eta entitateek erabiltzen dituzten lokalak hobetu eta haien jarduera erraztearren, ekipamendu inbentariagarria erosi edo azpiegitura obrak egiteko, elkarrekiko lehiaketa bidez, diru laguntzak ematea da oinarri hauen xedea.
  • Ezingo dira bi laguntza motak batera jaso eta, beraz, bata ala bestea aukeratu beharko da.

• 2.-Entitate onuradunak

  • Udalerri mailako edo udalerriz gaindiko antolakuntza edo hedapena duten gazte elkarte eta entitateek izango dute diru laguntzak eskuratzeko aukera, ekipamendu inbentariagarria erosteko apartatuari dagokionez; eta azpiegitura obrak egiteko apartatuari dagokionez, aurretik aipatu horien artean, bakar-bakarrik haur edo gazteen elkarteen inguruko jarduerak egitera xedatutako lokalaren titularitatea edo gutxienez horren hamar urteko lagapena dutela frogatzen dutenek.
  • Ondorengo hauek ez dira kontuan hartuko subentzioak ematerakoan:
    • Beste entitate batzuen menpeko sekzioak.
    • Lehentasunez eskolako edo eskolaz kanpoko jarduerak garatzen dituzten elkarteak.
    • Foru aldundi honetatik laguntza deialdiaren aurreko bi urteetan kontzeptu berean dirua jaso duten elkarteak. Kontzeptu bera da, alegia, edo ekipamendu inbentariagarria erostea, edo azpiegiturako obrak egitea. Muga hau ez da kontuan hartuko eskaera material informatikoa erosteko edota internetera sarrera lortzeko bada, beti ere azken bi urteetan jasotako laguntzak ez badira helburu horietarako jaso.

• 3.-Aurkeztu beharreko dokumentazioa

  Eskaera orriak ondoren adierazten den dokumentazioarekin batera aurkeztu beharko dira:

  • Azpiegiturako lanak egiteko eskaeren kasuan:
    • Lokalaren planoa, zehatz-mehatz adieraziz zer ezaugarri dituen eta zer hobekuntza proposatzen diren.
    • Lokalaren jabetza titulua edo errentaren agiria. Horrelakorik ez baldin badago, lokala erabiltzeko lagapenaren kontratua aurkeztu beharko da edo hori ziurtatzen duen notario akta.
    • Obren aurrekontu zehatza, enpresa batek egindakoa, onarpen erabakiarekin zurituta.
  • Material inbentariagarria erosi behar denean:
    • Entitateak dagoeneko daukan materialaren azaleko deskribapen bat eta erosi nahi den materialaren ezaugarriak eta xedea ziurtatzen dituen agiri bat.
    • Erosi behar den materialaren aurrekontua, hornitzaile batek egindakoa.

      Aurrekoaz gain, eskatzaileak irekitako kontu korronte baten jabetasuna ziurtatuko duen agiria, diru edo aurrezki etxe batek emana. Agiri hori aurkeztu beharko da, bakar-bakarrik, diru laguntza bat lehenengo aldiz eskatzen denean edo kontuaren ezaugarriak aldatu direnean.

      Material informatikoa eta interneteko lotura erosteko finantzazioa lortzen duten elkarteek diru laguntza eskaerak eta gainerako tramitazio administratiboak euskarri informatikoan egiteko konpromisoa hartu behar dute, horretarako Haurren, Nerabeen eta Gazteen Zerbitzuak jarritako aplikazioen bidez.

• 4.- Diru laguntzak ebaluatu eta kopuruak finkatzea

  • Aurkezten diren diru laguntza eskaerak Haurren, Gazteen eta Garapenerako Lankidetzaren Zerbitzuko batzorde batek aztertu eta baloratuko ditu, eta ondoren ebazpen proposamena igorriko dio organo eskumendunari. Batzordea osatuko dute Zerbitzuko buruak, dagokion Ataleko buruak eta Zerbitzuko teknikari batek.
  • Zenbateko diru laguntza emango den erabakitzeko, honako irizpideak jarraituko dira: oinarri soziala eta proiekzioa, finantzaketa iturrien analisia, eskuratu nahi den ekipamenduaren edo egin nahi diren obren balorazioa, obren exekuzioaren eta elkarte eskatzaileak eskainitako zerbitzu eta jardueren kalitate/kantitatearen hobekuntzaren artean dagoen lotura maila, epe ertainera eta luzera.
  • Ekipamendu inbentariagarria eskuratzeko ondorengo lehentasunak erabiliko dira:
    • Astialdiko taldeak
      • Egoitzetarako oinarrizko altzariak.
      • Udaleku etxeetarako altzariak.
      • Kanpaldietarako materiala.
      • Material informatikoa, interneteko konexioa eta ikus-entzunezko materiala.
    • Gazte taldeak:
      • Egoitzetarako oinarrizko altzariak.
      • Elkartearen berezko jarduerekin zerikusia duten materialak.
      • Material informatikoa, interneteko konexioa eta ikus-entzunezko materiala.

        Norberaren erabilerarako materialak, material suntsigarriak edo kirol materialak ez dira subentzionatuko.

  • Azpiegitura obrak egiteko, oinarrizko azpiegitura behar duten elkarte egoitzetan obrak egiteko eskaerak bakarrik izango dira kontuan, inoiz ez udalekuetarako etxe edo gazteentzako aterpeetan egitekoak.
  • Aipatutako irizpide horiek aplikatuko dira Gizarte Politikako Departamentuko foru diputatuak oinarri hauek garatzeko ematen duen foru aginduan xedatzen den baremoaren arabera.
  • Eskaeran aurkeztutako datuen arabera diru laguntzaren hasiera bateko kalkulua egingo da eta horren arabera emango dira laguntzak.

    Dena dela, diru laguntzaren behin betiko zenbatekoa 6. oinarrian aipatzen den dokumentazioaren araberakoa izango da.

    Diru laguntzak ez du inola ere egitekoa den gastuaren %100 estaliko; kasuan kasuari dagokion portzentajea aplikatuko da. Azkenerako ez bada hasiera batean aurreikusitako eta onartua izandako gastua egiten, diru laguntzaren zenbatekoa egokitu egingo zaio benetan egindako gastuaren kopuruari, aldea ordainduz edo aurreratutako eta zuritu gabeko zatia itzultzea eskatuz.

• 5.-Diru laguntza ordaintzea

  Honela ordainduko da diru laguntza:

  • Zenbatekoaren %60, laguntza ematea onartzen denean. Kontuan hartuta foru dekretu honetan aurreikusitako diru laguntzen erakunde onuradunen ezaugarriak, horiek ez dute bermerik aurkeztu beharko aurreratutako laguntzaren zenbatekoagatik.
  • Gainerako %40a, 6. oinarrian adierazitako betebeharrak betetzean.

• 6.- Zuritu beharra

  • Laguntza ematen zaien entitate edo elkarteek ondorengo agiriak aurkeztu beharko dituzte urte bakoitzeko azaroaren 1a baino lehen:
    • Egindako erosketak eta obrak deskribatzen dituen memoria.
    • Elkartearen urteko sarrera-gastuen balantzea, Gipuzkoako Foru Aldundiko Haurren, Nerabeen eta Gazteen Zerbitzuak emandako ereduaren arabera egina.
    • Diruz lagundutako kontzeptuen arabera berezitako gastu eta sarreren ordainagirien zerrenda zenbakitua, burutzearen arabera antolatua, ordainagirien destino edo jatorria adieraziko duen azalpen bat ere eginez. Gastua, laguntza emandako kontzeptuetan egin beharko da eta diruz lagundutako materialaren edo egindako obraren zenbatekoaren %100 zuritu beharko da.
  • Aipatutako epean eskatu den dokumentazioa edo honen zati bat aurkeztu gabe utziz gero, diru laguntza erabat edo zati batean galdu egingo da eta aurreratutako eta zuritu gabeko diru kopuruak itzuli behar dira.
  • Laguntza jasotzen duten entitateek baimena eman beharko dute egindako erosketak edo obrak egiaztatzeko Gipuzkoako Foru Aldundiko Gizarte Politikako Departamentuak egiten dituen jarduketa guztietarako.
  • Entitateak behartuta daude diru laguntzarekin eskuratutako ondasun edo egindako obren esandako xedeari eustera, gutxienez bost urtean, erregistro publikoetan idazteko gai diren ondasunen kasuan, eta bi urtean, gainerako ondasunen kasuan, betebehar hori ez betetzea dirua itzultzeko arrazoi izango delarik, foru dekretu honen 8. artikuluan ezarritako baldintzetan.

• 7.-Aurrekontua

  Diru laguntza hauen urteko deialdian zehaztuko dira aurrekontu programa eta zuzkidura.