V. ERANSKINA

GIPUZKOAKO UDALEK SUSTATUTAKO HAUR ETA GAZTEENTZAKO JARDUERA, PLAN, PROGRAMA ETA ZERBITZUAK AURRERA ERAMATEKO DIRU LAGUNTZAK

• 1.-Xedea

  Oinarri hauen xedea Gipuzkoako udalek sustatutako haur eta gazteentzako jarduera, plan, programa eta zerbitzuak aurrera eramateko diru laguntzak ematea da.

  Udalen eta Gipuzkoako Foru Aldundiaren arteko lankidetzarako hiru modalitate ezartzen dira:

  • Plan bat egitea, hiru urteko ikuspegiarekin, hor jarduera eta ekipamenduak sartuz.
  • Aurrera eramatea udalerriko Hobekuntza Plana, udal haur eta gazteen arloko zerbitzuen eta Gipuzkoako Foru Aldundiaren artean egindakoa.
  • Haur, nerabe eta gazteen arlora zuzendutako jarduerak eta zerbitzuak aurrera eramateko diru laguntza puntualak.

  Laguntza hauetan ez dira sartzen, kirol izaerakoak, eskolakoak edo eskola orduz kanpokoak diren jarduerak eta programak, ez eta udal eskatzailearen jaien programa osatzen dutenak.

• 2.-Entitate onuradunak

  Oinarri hauetan jasotako eskakizun guztiak betetzen dituzten Gipuzkoako udal guztiek izango dute diru laguntzak eskuratzeko aukera.

• 3.-Aurkeztu beharreko dokumentazioa.

  • Diru laguntzak tramitatzeko, planak gauzatzeko direnean (1. eta 1.b) paragrafoak):
    • Alkateak izenpetutako eskaera, plan hori aurrera eramateko konpromisoa azalduz.
  • Jarduera eta zerbitzuetarako diru laguntza puntualak eskatzen dituztenentzat (1.c paragrafoa):
    • Eskaera orria, Haurren, Nerabeen eta Gazteen Zerbitzuak horretarako diseinatutako aplikazio informatikoa erabiliz.
    • Udaleko kontu hartzailearen ziurtagiria, diruz lagundu daitezkeen programa, jarduera eta zerbitzuetan udalak egindako gastua egiaztatzen duena.
  • Udalerri bakoitzeko eskaera bakarra onartuko da eta beraz, programak unitate administratibo desberdinetakoak badira, nahi eta nahi ez elkarrekin aurkeztu behar dute eskaria.

• 4.- Diru laguntzak ebaluatu eta kopuruak finkatzea

  • Aurkezten diren diru laguntza eskaerak Haurren, Gazteen eta Garapenerako Lankidetzaren Zerbitzuko batzorde batek aztertu eta baloratuko ditu, eta ondoren ebazpen proposamena igorriko dio organo eskumendunari. Batzordea osatuko dute Zerbitzuko buruak, dagokion Ataleko buruak eta Zerbitzuko teknikari batek.
  • Planak garatzeko laguntzen kasuan, Gizarte Politikako Departamentuak, udal bakoitzak egindako diru laguntza eskaera aztertu ondoren, eta kontuan hartuz guztira zer diru laguntza ematea aurreikusten den, aurkeztutako programek zer eduki eta izaera duten eta azken urteotan udal entitateak antzeko xedeetan zenbateko diru baliabideak erabili dituen, diru laguntzak zehazteko eta emateko lankidetza hitzarmenak sina ditzake. Hitzarmen horietan, jasotako laguntzarengatik erakunde subentzionatuek bereganatzen dituzten obligazioak azalduko dira.
  • Udal bakoitzari zer laguntza eman zehazteko orduan, diru laguntza izateko aukera emango zaie ondoren zehazten diren jarduerak edo zerbitzuak antolatu edo eskaintzen dituztenei:
    • 3.1. Haur, nerabe eta gazteentzako udal planak. Adin tarte horietakoen behar eta eskaerei erantzuteko planteamendu koherente eta aski neurtuak egiten dituzten egitasmoak finantzatuko dira.
    • 3.2. Udalerriko haur, nerabe eta gazteen alorrean “Hobekuntza plana” garatzea.
    • 3.3. Haur, nerabe eta gazteei zuzendutako jarduera, programa eta zerbituzak.
      • 3.3.1. Dokumentazioa, ikerketak eta ebaluazioa: berariaz gazteei begira ekipamendu beharren azterketak edo ekipamendu soziokultural publikoen kudeaketa eta programazio proiektuak egitea. Azterketa soziologikoak egitea, haur, nerabe eta gazteei zuzendutako sare soziokulturalak gauzatzea.
      • 3.3.2. Prestakuntza: gazteriako teknikari eta informatzaileentzako prestakuntza eta birziklatze ikastaroetan parte hartzea, Gipuzkoako Foru Aldundiko Gazteria eta Komunitate Ekintzako Zuzendaritza Nagusiak antolatzen dituenetan izan ezik.
      • 3.3.3. Gazte informazioa
      • 3.3.4. Heziketa-aisia: Haur, nerabe eta gazteei zuzenduak diren heziketa ez arautuko eta gizarte eta kultura alorreko programak (astialdiko jarduerak, musika kontzertuak, antzerki lanak, tailerrak eta ikastaroak, etab.).

        Era berean, herriko gazteek egindako jarduerak ere diruz lagundu ahal izango dira, udalak, gazteen parte hartzea eta beraien ekimenak bultzatzeko finantziatu nahi baldin baditu.

        Nerabe eta/edo gazteei zuzendutako ekipamendu soziokultural publikoetarako material inbentariagarria erosteko gastuak, gazteentzako aterpeak izan ezik, eta bereziki nerabe eta/edo gazteei zuzendutako ekipamendu soziokultural publikoetako zerbitzuak eta programak kudeatzen dituzten langileen gastuak.

        Gazteen artean jarrera eta jokamolde xenofoboak eta arrazistak eragozteko kanpainak egitea.

      • 3.3.5. Sustapena: Gazteen arte sorkuntza eta ekoizpena bultzatu eta laguntzeko programak egitea, udalak haur, nerabe eta gazte elkarteei emandako diru laguntzak, udalerriko gazteek egindako eta gazteei zuzendutako herri aldizkariak egitea, udalerriko gazteek osaturiko musika taldeek maketak grabatzea, musika taldeek prestatze saioak egin ditzaten lokalak alokatzea, gazteek osaturiko musika taldeek prestatze saioak egin edota grabatzeko udal lokalen funtzionamendua, udalerriko artista gazteek egindako arte plastikoetako lanen erakusketak.

        Elkarteen zabalkunderako erakusketak, azokak eta jarduerak antolatzea.

        Gazteek parte hartzeko udal organoak.

      • 3.3.6. Emantzipazioa.
  • Jardueraren justifikatutako zenbatekoaren %20ko diru laguntza portzentajea edukiko da kontuan 1.000 biztanle baino gutxiagoko udalerrietan. Atal honetan, mankomunitate bat bada, udalerri bakar baten eskaera onartuko da bakarrik, haren ordezkaritzan.
  • Aipatutako irizpide horiek aplikatuko dira Gizarte Politikako Departamentuko foru diputatuak oinarri hauek garatzeko ematen duen foru aginduan xedatzen den baremoaren arabera.

    Udalerriren bati dagokion diru laguntza ez bada 200,00 eurotara iristen, zenbatekoa borobildu egingo da kopuru horretara iritsi arte.

• 5.-Diru laguntza ordaintzea

  1.c) atalean aurreikusitako diru laguntzak txanda bakarrean ordainduko dira, ematearekin batera, 3. oinarrian zerrendatzen den dokumentazioa aurkezten denean. Diru laguntzaren emakida lankidetza hitzarmen baten bitartez arautzen denean, ordaintzeko era ere bertan ezarriko da; aurrerakinak egitea aurreikusten bada, kontuan hartuta foru dekretu honetan aurreikusitako diru laguntzen erakunde onuradunen ezaugarriak, horiek ez dute bermerik aurkeztu beharko aurreratutako laguntzaren zenbatekoagatik.

• 6.- Aurrekontua

  Diru laguntza hauen urteko deialdian zehaztuko dira aurrekontu programa eta zuzkidura.