VIII. ERANSKINA

• Diru laguntza ebaluatzeko eta kopurua finkatzeko irizpideak

GIPUZKOAKO LURRALDE HISTORIKOKO UDAL ERAKUNDEEI HAUR, NERABE ETA GAZTE EKIPAMENDUAK ERAIKITZEKO, BERRITZEKO EDO EGOKITZEKO LANAK EGITEKO DIRU LAGUNTZAK

• 1.-Xedea

  • Oinarri hauen xedea Gipuzkoako Lurralde Historikoko udal erakundeei haur, nerabe eta gazte ekipamenduak eraikitzeko, berritzeko edo egokitzeko lanak egiteko diru laguntzak elkarrekiko lehiaketa bidez ematea da. Haur, nerabe eta gazte ekipamendutzat hartuko da berariaz haurrei, nerabeei edo gazteei zuzendutako titularitate publikoko edozein azpiegitura, gizarte edo kultur izaerakoa, eta doako sarrera duena, bestelako ekipamenduren baten barnean egon ala ez egon.
  • Diru laguntza eskuratu ahal izateko, haur, nerabe eta gazte ekipamenduek honako mota hauetakoren batekoak behar dute izan:
    • Haur, nerabe edota gazte ekipamendu orokorrak: ekipamendu hauek herri mailakoak dira, egon daitezke hartarako bakarrik den eraikin batean nahiz ekipamendu edo eraikin zabalago baten barneko lokal independentean; haur, nerabe eta gazte jendeari elkartzeko tokia, baliabideak eta zerbitzuak eskaintzeko xedea dute, haurrek eta gazteek aukera izan dezaten jarrera aktiboekin biltzeko, beren proiektuak aurrera eramateko, informaziorako, taldeak sendotzeko, haur, nerabe eta gazte entitateekin elkarlanean aritzeko, eta gazte kultura esperimentatu, sortu eta zabaltzeko. Mota honetan sartzen dira haur txoko, ludoteka, gaztetxe, gazteleku, gaztetxoko, gazteentzako lokal, eta antzeko izenez ezagutzen ditugunak.
    • Gazte ekipamendu espezializatuak: ekipamendu hauek herri mailakoak dira, bereziki haurrei, nerabeei eta gazteei zuzendutako ekintzak aurrera eramateko eta/edo zerbitzu espezializatuak emateko. Mota honetan sartzen dira segidan adierazten diren haur eta gazte ekipamenduak:
      • Elkarteentzako baliabide zentroak: hauen xedea haur eta gazte elkarte edo talde batek baino gehiagok erabiliko dituzten zerbitzuak eta baliabideak eskaintzea da (lokal, altzari, administrazio zerbitzu, eta abar). «Elkartelekuak» ere deituko diegu.
      • Kultur produkzioko zentroak: gazteen kultur produkzioari laguntzeko xedea dute. Hala, bada, eduki ditzakete musika taldeentzako entsegu eta grabazio aretoak, ikus-entzunezkoen edo informatikako esperimentaziorako lekuak, eta abar.
      • Gazte informazioko zerbitzuak: gazte informazioko bulegoak eta gazte informazioko lekuak.
    • Ekipamendu orokorretako haur, nerabe edo gazte guneak: toki hauek titularitate publikoko beste ekipamendu batzuetan egonik, haur, nerabe eta gazteek bakarrik erabiltzekoak dira. Egon daitezke kultur etxeetan, gizarte zentroetan, ikastetxeetan (eskola orduz kanpo eta xede akademikorik gabe erabiltzeko), eta abar.
  • Oinarri hauek arautzen dituzten diru laguntzetatik kanpo geratzen dira honelako esku hartzeak:
    • Ikastetxeetarako direnak.
    • Kiroletarako direnak.
    • Ostalaritzarako direnak.
    • Ekipamendua egingo den tokiko lurra erosteko eta hiritartzeko, edo lur horretan lorezaintza lanak, ur hornidura eta saneamendukoak, edo antzekoak egiteko direnak.
    • Lanak egiterakoan izandako hutsegite edo akatsengatik sortutako aurrekontu gehikuntzak. Hala ere, aintzat hartzekoak izan daitezke arazo geoteknikoengatik eta neurketen emaitza uste baino handiagoengatik sortutako aurrekontu gehikuntzak, baita hasierako proiektuan aurreikusi gabeko hobekuntzek ekarritakoak ere, baldin Gipuzkoako Foru Aldundiak aldez aurretik ontzat ematen baditu. Aurrekontu gehikuntza onartua izango bada, lanen esleipen prezioaren eta azken kostuaren arteko aldea ez da izango haren %10 baino handiagoa, eta ezingo dira gainditu foru dekretu honetan diru laguntzetarako ezartzen diren gehieneko zenbatekoak.
  • Diru laguntza jaso dezakete deialdia egiten den urteko urtarrilaren 1etik aurrera hasten diren proiektuak, beti ere urte horretan bere osotasunean edo partzialki egiten badira.

• 2.-Entitate onuradunak

  Aurreko puntuan jasotako eskakizunak betetzen dituzten haur, nerabe eta gazte ekipamenduetan lanak egiteko proiektuak aurkezten dituzten Gipuzkoako udalek edo udal entitateek izango dute oinarri hauek arautzen dituzten diru laguntzak eskuratzeko aukera.

  Udalek udalerri bat baino gehiagoren arteko haur, nerabe eta gazte ekipamenduak egiteko edo eraberritzeko proiektuak ere aurkez ditzakete. Horretarako, tarteko diren udalek mankomunitatea edo izaera formaleko beste elkarteren bat osatu beharko dute, eta Gizarte Politikako Departamentuari jakinarazi behar diote.

• 3.-Aurkeztu beharreko dokumentazioa

  • Eskaera orriak ondoren adierazten den dokumentazioarekin batera aurkeztu beharko dira:
    • Lanak gauzatzeko proiektua, honako hauek behintzat jasoko dituena: memoria (kontuan hartu beharko diren premiak eta edozein motatako faktore guztiak azaltzen dituena), kokapen eta banaketa planoak, eta proiektuaren eta proiektatutako lanen ezaugarriak, xehetasunez azalduta (edo, egitekoak diren lanak txikiak badira, haien zehaztapen teknikoen ale bat). Horiekin batera ekarriko da aurrekontua ere, osagai hauek bertan dituela: Neurketen emaitza, onartutako prezioen taula, eta aurreikusitako kostu guztiak biltzen dituen laburpena edo aurrekontu orokorra.
    • Lanak egiteko aurreikusten diren epeak.

• 4.- Diru laguntzak ebaluatu eta kopuruak finkatzea

  • Diru laguntzen ebazpena bi fasetan egingo da:
    • 1.fasea

      Aurkezten diren diru laguntza eskaerak Haurren, Gazteen eta Garapenerako Lankidetzaren Zerbitzuko batzorde batek baloratuko ditu. Batzordea osatuko dute Zerbitzuko buruak, dagokion Ataleko buruak eta Zerbitzuko teknikari batek. Aipatutako Batzordeak aurkeztutako proiektuen egokitasuna ongi baloratu ahal izateko, aholkularitza eta dagozkion txosten teknikoak eskatu ahal izango ditu.

      Diru laguntzarik emango den eta zenbatekoa emango den erabakitzeko, honako irizpideak jarraituko dira:

      • Batez ere haur, nerabe eta gazte ekipamendurik ez duten herrietako proiektuak eta gizarte eta kultura ekipamenduen aldetik urri dabiltzanetakoak (gizarte beharra handiagoa delako edo kalitate txarreko azpiegiturak daudelako) hartuko dira aintzakotzat. Gehienez 25 puntu.
      • Proiektuaren alde jokatuko du herriko beste ekipamendu batzuekin osagarri izateak, beteko dituzten eginkizunen aldetik. Alde jokatuko du, era berean, proiektua eskualde mailakoa izateak, lurralde mailan baliabideak hobeto erabili eta errentagarriago egiteagatik. Gehienez 25 puntu.
      • Nerabeentzako ekipamenduak. Gehienez 10 puntu.
      • Herrian dauden lokalak xede honetarako erabiltzea. Gehienez 10 puntu.
      • Ekipamendua beste xede batzuetarako ere erabiltzen denean, erabilpenak elkarrekin bateragarriak izatea, bete behar dituzten eginkizunen aldetik. Gehienez 10 puntu.
      • Aurkeztutako proiektuaren kalitatea, dituen alderdi berritzaileak, garapena eta erakargarritasuna direla eta, beste udalerri eta ekipamendu batzuetan aurrera eramateko eredu badira. Gehienez 10 puntu.
      • 1.000 biztanle baino gutxiagoko udalerriak: Gehienez 10 puntu.

      Ekipamendua gazteentzako informazio zerbitzua denean, proiektuak Euskal Autonomia Erkidegoko 1993ko uztailaren 20ko 211/93 Dekretuan, Gazteentzako Informazio Zerbitzuen onespen ofiziala arautzen duenean, ezarritako eskakizunak bete beharko ditu.

      Baloraziorako Batzordearen proposamenaz, Departamentuko foru diputatuak erabakia hartuko du, diru laguntza eskura dezaketen ekipamenduen behin-behineko zerrenda eta ekipamendu guztien lehentasun ordena ezarriz, proiektu bakoitzari dagokion onartutako aurrekontua eta aurreikusten den diru laguntza zehaztuz. Aldi berean zehaztuko dira diru laguntza eskuratu ahal izateko ezarritako baldintza guztiak betetzen dituzten baina aurrekontu faltagatik dirurik jasoko ez duten ekipamenduen zerrenda, eta baldintzak ez betetzeagatik diru laguntza ez dagokien ekipamenduen zerrenda.

      Ebazpen hori zerbitzuko web orrian argitaratuko da: www.gipuzkoa.net/gazteria. Hor argitaratzeak banakako jakinerazpena ordezkatuko du eta lege ondorio guztietarako jakinerazpena egintzat hartuko da argitaratu eta hurrengo egunetik hasita. Hori hala bada ere, ebazpen hori bananduta errekurritu ezin daitekeen tramiteko egintzatzat hartu behar da, 1992ko azaroaren 26ko 30/1992 Legeko 107.1 artikuluan aurreikusitako kasuetan izan ezik, eta hor sartuta egoteak ez du emango diru laguntza jasotzeko eskubiderik, diru laguntzaren eraginkortasuna hurrengo paragrafoan adierazten diren agiriak aurkeztearen baldintzapean geratzen baita. Horrela izanez gero, jakinarazitako zaie erakunde eskatzaileei doakien proiektuetan sartu beharrekotzat jotzen diren aldaketa teknikoak.

      Erakunde eskatzaileek 30 eguneko epea izango dute aurreko atalean adierazitako argitalpen egunetik hasita, aipatutako zerrendan diru laguntzaren jasotzailetzat agertzen direnek honako dokumentazio hau aurkeztu beharko dute:

      • Egin beharreko aldaketa teknikoak proiektuan sartuta daudela egiaztatzen duen dokumentazioa.
      • Gazte ekipamendua egitea onartzeko hartutako udal erabakiaren ziurtagiria, eta, berarekin batera, haren finantzaketa plana eta udalak finantzatu beharreko zatiari aurre egiteko behar adina kreditu badagoela egiaztatzen duten agiriak.
      • Proiektuko lur edo eraikinak udalak erabilgarri dituela sinestarazten duen agiriren bat, hala nola lokalaren jabe dela dioen ziurtagiria, lagapen hitzarmena, edo besteren bat.
      • Ekipamendua kudeatzeko proiektua (antolaketa egitura, ekintzen programazioa, gazteek parte hartzeko formulak, aurrekontua, eta abar).

      Dokumentazioa bidaltzeko epea ezingo da luzatu, Gizarte Politikako Departamentuaren iritziz behar adinako arrazoiak daudenean besterik, eta gehienez hilabete luzatuko da.

    • 2.fasea

      Eskatutako dokumentazioa behar den eran eta epean jaso ondoren, Balorazio Batzordeak diru laguntza jasotzeko ekipamenduen behin betiko zerrenda proposatuko du, eta orduan departamentuko foru diputatuak emango edo ukatuko ditu diru laguntzak. Hala ere, hasierako epea edo, bestela, luzapenarena amaitu eta erakunderen batek esandako dokumentazioa ekarri ez badu, galdu egingo du esleitutako diru laguntza jasotzeko eskubide oro, eta, zenbatekoak aukera ematen badu, behin-behineko zerrendan egonik aurrekontu baliabideen faltagatik hasiera batean diru laguntzarik gabe gelditutako erakundeari edo erakundeei epea emango zaie beren dokumentazioa aurkezteko.

      Gizarte Politikako Departamentuak diru laguntza jaso behar duten erakundeei udal teknikari bat izendatzeko eskatuko die, Aldundiko beste batekin batera proiektua gauzatzeko lanen jarraipen batzordea osa dezan.

  • Proiektuetarako eman daitekeen gehieneko diru laguntzak ezingo du 200.000,00 euro baino gehiagoko izan banakako proiektu bakoitzeko.
  • Gaztegunea titularitate publikoko ikastetxeren batean dagoenean, Aldundiaren esku hartzea bideratzeko, hitzarmena egingo da Gipuzkoako Foru Aldundiaren, Eusko Jaurlaritzako Hezkuntza, Unibertsitate eta Ikerketa Sailaren eta udal erakundearen artean. Hitzarmen horietan honako zehaztasunak jasoko dira, gutxienez:
    • Egin beharreko lanak finantzatzeko administrazio bakoitzak izango dituen betebehar ekonomikoak.
    • Lanak egiteko garaian zein administrazio izango den kontratatzaile.
    • Gaztegunearen diseinua eta izango duen kudeaketaren programa.
    • Gazteguneak gerora izango dituen mantentze, zaintza, konponketa, garbiketa eta abarretako gastuak zein administraziok (batek edo gehiagok) hartuko dituen bere gain.
    • Gaztegunea jarduera ez-akademikoetarako soilik erabiliko dela eta gazte guztientzat irekia izango dela dioen konpromisoa.

    Horrelakoetan, diru laguntza emateko erabakia Diputatuen Kontseiluak lankidetza hitzarmena onartuz hartzen duen erabakia bera izango da, gero Gipuzkoako Batzar Nagusiek berrespena ematearen mende beti ere.

• 5.-Diru laguntza ordaintzea

  • Foru Aldundiak egokitzat jotako proiektuaren aurrekontuaren aldean obren esleipen prezioak dakarren beherapen portzentajea aplikatuko zaio emandako diru laguntzari, neurri berean apaltzeko.
  • Ordaindu beharreko diru laguntza doitu egingo da obra kontratuen esleipen prezioek beherapenik ekartzen badute eta proiektuak gauzatu izana ez bada behar bezala justifikatzen, horiek gertatzen diren neurrian, eta horrelako murrizpenen ondorioz sobera gelditzen diren kredituak erabilgarri izango dira aurrekontu baliabiderik ezagatik diru laguntzarik gabe gelditutako beste ekipamendu batzuk finantzatzeko. Horrelakoetan, eranskin honen 4.1.2. fasea atalean esan bezala jokatuko da.
  • Diru laguntza benetan ordaintzeko, erakundeei aldaketa teknikoak egiteko adierazten zaienean, aldaketa horiek aurretik egitea izango da baldintza.
  • Diru laguntza obra ziurtapenak aurkeztu ahala ordainduko da. Obra ziurtapenak Gizarte Politikako Departamentuak emango duen eredu normalizatuan egin beharko dira. Ordainketa bakoitzean, obra ziurtapenaren zenbatekoak obraren esleipen prezioaren zenbateko ehunekoa egiten duen, diru laguntzaren beste hainbesteko ehunekoa ordainduko da.
  • Nolanahi ere, emandako diru laguntzaren azken %20a obraren azken ziurtapena edo likidazioa aurkeztean ordainduko da. Horretarako, ekipamenduak berari dagokion araudi sektorialean ezarritako eskakizun guztiak betetzen dituela egiaztatu beharko da.

• 6.- Zuritu beharra

  • Diru laguntza jasoko duten proiektuak aurkeztu dituzten udalek segidan adierazten den dokumentazioa bidali behar dute Gizarte Politikako Departamentura, lanak hasi baino lehenago:
    • Lanen kontratua esleitzeko erabakiaren hitzez hitzeko ziurtagiria.
    • Lanen zuzendaritza izendatu izanaren ziurtagiria.
    • Lanen hasierako aktaren kopia.
    • Aplikagarria den araudi sektorialean eskatzen diren baimen edo lizentzien kopiak.
  • Gizarte Politikako Departamentuak ahalmena izango du, egoki baderitzo, lanen martxa gainbegiratzeko, kalitate kontrolak egiteko, eta laguntzak aurreikusitako xedeetara bideratzen diren ikuskatzeko, eta laguntza jasotzen duten erakundeek baimena eman beharko dute aipatutako departamentuak obrak egiaztatzeko egiten dituen jarduketa guztietarako.
  • Ekipamendua bere eginkizunetan hasi aurretik, udal erakundeak haren kudeaketa proiektua onartu behar du, eta Gizarte Politikako Departamentuari horren berri eman.
  • Oinarri hauetan ezarritako laguntzak jasotzen dituzten ekipamenduetan xafla iraunkorrak jarri beharko dira, haren finantzaketan Gipuzkoako Foru Aldundiak parte hartu duela adierazteko.
  • Erakundeak behartuta daude diru laguntzarekin egindako obren esandako xedeari gutxienez bost urtean eustera, eta betebehar hori ez betetzea dirua itzultzeko arrazoi izango da, foru dekretu honen 7. artikuluan ezarritako baldintzetan.

• 7.- Aurrekontua

  Diru laguntza hauen urteko deialdian zehaztuko dira aurrekontu programa eta zuzkidura.