18/2006 FORU DEKRETUA

2006ko martxoaren 14ko 18/2006 Foru Dekretua, Giza Eskubideetarako, Enplegurako eta Gizarteratzeko Departamentuko haur, nerabe eta gazteen arloan diru laguntzak emateko oinarriak onartzen dituena.

Administrazioak landu ohi dituen sustapen programen bidez, partikularrek nahiz herri erakundeek egiten dituzten eta herri onurakoak diren ekimenak eta jarduerak bultzatzen dira hainbat bitarteko erabilita. Umeen, nerabeen eta gazteen alorrean, Gipuzkoako Foru Aldundia aisialdi eta astialdiko jarduerak, prestakuntzakoak, elkarteak sustatzekoak eta bereziki haur, nerabe eta gazteei zuzendutako informazioa zabaltzekoak bultzatzen ari da, xede horietarako diru laguntzak emanez.

Foru xedapen honek zortzi diru laguntza mota biltzen ditu eranskin banatan, eta diru laguntza bakoitzak xede eta hartzaile bereziak ditu, esate baterako, udaleku eta kanpamenduak egiteko laguntza ekonomikoak ematea, gazte elkarteen egoitzetan azpiegitura obrak udalekin batera finantzatzea edo gazteei zuzendutako urteko planak aurrera eramateko udalei laguntzea.

Hain diru laguntza mota ezberdinak foru dekretu bakar batera biltzeko arrazoiak hauek dira, batez ere: laguntzen hartzaileei arau erreferentzia bakarra eskaintzea, eta haur, nerabe eta gazteen gaietan diru laguntzak emateko horrenbeste espediente egiteak dakarren tramitazio administratiboa erraztea.

Beste aldetik, epemugarik gabeko foru dekretua egin nahi izan da; hau da, datozen urteetan ere aldatu gabe mantenduko lirateke bai dekretuko arau orokorrak eta bai laguntza lerroei dagozkien eranskinetako arau bereziagoak, kontuan hartuta halere urtero deialdia egin beharko dela laguntza horiek emateko.

Azkenik esan behar da, eranskin batzuetan, laguntzak zein baldintzatan eta zenbatekoak eman erabakitzeko irizpideen aplikazio zehatzari begira, dekretu hau garatuko duen foru agindu bat aipatzen dela, jarraibide izango dena.

Horregatik, Giza Eskubideetarako, Enplegurako eta Gizarteratzeko Departamentuko foru diputatuaren proposamenez, eta Diputatuen Kontseiluak gaurko bilkuran eztabaidatu eta onartu ondoren,

XEDATU DUT

1. artikulua.- Laguntza lerroak.

Giza Eskubideetarako, Enplegurako eta Gizarteratzeko Departamentuko haur, nerabe eta gazteen arloan diru laguntzak arautzeko oinarriak onartzen dira eta foru dekretu honi eranskin gisa gehitzen zaizkio, honako zerrendaren arabera:

• Haur, nerabe eta gazteentzako udalekuak eta kanpaldiak antolatzea. I. eranskina.
• Material inbentariagarria erostea edo gazte elkarteek beren lokaletan azpiegiturako obrak egitea. II. eranskina.
• Haur edo gazte elkarteen koordinakunde edo federazio egitura edo antzekoa daukaten udalerriz gaindiko elkarte edo erakundeek urteko jarduerak egitea. III. eranskina.
• Haur, nerabe eta gazteen artean praktika onak sustatzeko ikerketa, garapen eta berrikuntza proiektuak egitea. IV. eranskina.
• Gipuzkoako udalek haur, nerabe eta gazteentzako jarduerak aurrera eramatea. V. eranskina.
• Haur eta gazteen astialdiko heziketa eskolek heziketarako urteko planak aurrera eramatea. VI. eranskina.
• Udalerriaz gaindiko esparruetan diharduten gazte elkarteek programak eta jarduerak aurrera eramatea. VII. eranskina.
• Gipuzkoako udalek haur, nerabe eta gazte ekipamenduetan obrak egitea. VIII. eranskina.

2. artikulua.- Urteko deialdia.

Urtero deialdi bat egingo da foru dekretu honetan arautzen diren laguntzak emateko, eta deialdian finkatuko dira eskaerak aurkezteko epeak eta baimendutako gastua, kontu sail bakoitzari egotzitakoaren arabera sailkatuta.

Aurtengo ekitaldian, eskaerak aurkezteko epea kasuan kasurako xedapen gehigarriaren 1. atalean ezarritakoa da eta gastu baimendua xedapen horretako 2. atalean zehaztutakoa da.

3. artikulua.- Entitate onuradunak.

• Diru laguntzen onuradun izaera izango du diru laguntzaren oinarri den jarduera egin behar duen entitateak, edota diru laguntza jasotzea zilegi egiten duen egoeran dagoenak.

  Foru dekretu honetan arautzen diren diru laguntzen onuradun ezin izango dira hurrengo egoeraren batean diren erakundeak:

  • Epai irmoaren bidez diru laguntzak edo laguntza publikoak lortzeko aukera galtzera kondenatu dituztenak.
  • Konkurtso deklarazioa eskatuta egotea, edozein prozeduratan kaudimengabekotzat deklaratuta egotea, konkurtsoan deklaratuta egotea, kontu-hartze judizialaren barruan egotea edo Konkurtso Legearen arabera ezgaituta egotea, konkurtsoaren kalifikazio epaian jarritako ezgaitasun epea amaitu gabe badago.
  • Administrazioarekin egindako edozein kontraturen suntsiarazpen irmoa eragin dutenak, horren kausaren errudun deklaratuak izan badira.
  • Administratzaileak edota pertsona juridikoen legezko ordezkaritza dutenak, gai horiek arautzen dituen arautegian aurreikusitako terminoetan bateraezintasun kasuetakoren batean sartuta egotea.
  • Indarrean dauden xedapenetan ezarritako zerga obligazioak eta Gizarte Segurantzarekikoak bete gabe edukitzea.
  • Ebazpen irmoaren bitartez diru laguntzak jasotzeko aukera galtzera zigortuak egotea, diru laguntzak erregulatzen dituen araudiaren edota Zergen Foru Arau Orokorraren arabera.
  • Diru laguntzak itzuli beharrari buruzko obligazioak ordaindu gabe edukitzea.

    Onuradun izaera lortzeko debekuetan sarturik ez egoteari buruzko egiaztapena egin dezakete erakundeek lekukotza judizialaren bidez edo ziurtagiri administratiboaren bidez, kasuen arabera, eta agiri horiek eskuratu ezin direnean, horien ordez herri administrazio baten edo notario baten aurrean egindako aitorpena aurkeztuta.

• Eranskin bakoitzean ezarritako betekizunez gain, diru laguntzen onuradunen betebeharrak dira ondoko hauek:
  • Diru laguntza emateko oinarrian den proiektua gauzatzea, jarduera egitea edota jokabidea aintzat hartzea.
  • Diru laguntza ematen duen organoaren aurrean egiaztatzea baldintzak betetzen dituela, eta diru laguntza emateko oinarrian izan den jarduera egin duela edo helburua bete duela.
  • Diru laguntza eman duen organoak egiten dituen ikuskatze lanak onartzea, baita kontrol organo eskudunek egin ditzaketen egiaztapen eta finantza kontrolak ere, aurreko zeregin horietan eskatuko zaien informazio oro emanez.
  • Diruz lagundutako jarduerak finantzatzeko beste diru laguntzak, laguntzak, sarrerak edo baliabideak lortu izanaren berri ematea diru laguntza ematen duen organoari. Jakinarazte hori ahal bezain laster eman behar da aditzera, eta betiere jasotako diru laguntzaren erabilera zuritu aurretik.
  • Zerga betebeharrak eta Gizarte Segurantzarekikoak egunean dituztela egiaztatzea, subentzio eta laguntzen esparruan aplikagarri den araudiak ezarritakoaren arabera. Horien izaera kontuan hartuta eta aipatutako araudian ezarritakoarekin bat etorriz, ez da beharrezkoa izango egiaztatze hori Tokiko Erakundeek egindako eskaeren kasuan.
  • Aplikagarri zaion merkataritzako edota zergei buruzko legediaren arabera, entitate onuradunak eraman beharreko kontabilitate eta erregistro liburuetan jasota uztea emandako laguntza eta horren gauzatzea.
  • Jasotako diru laguntzen erabilerari buruzko egiaztagiriak gordetzea, egiaztapen eta kontrol jarduketen gai izan daitezkeen heinean.
  • Foru dekretu honetako 9. artikuluan xedatutako beharkizunak betetzea.
  • Aplikagarri den araudian aurreikusitako kasuetan jasotako dirua itzultzea.
  • Diru laguntza eman duen organoari jakinaraztea diru laguntza ematerakoan kontuan hartutako egoeren aldaketa oro.
  • Giza Eskubideetarako, Enplegurako eta Gizarteratzeko Departamentuak deitzen dituen bileretan parte hartzea, horretarako ahalik eta parte hartzerik handiena egon dadin beharrezko bide eta bitartekoak ezarriz.

4. artikulua.- Eskaerak aurkeztea.

• Aurkezpen epea.

  Eskaera orriak, Haurren, Gazteen eta Garapenerako Lankidetzaren Zerbitzuak emango duen ereduaren arabera beteta, laguntza hauen urteko deialdian ezarritako epean aurkeztuko dira, eranskin bakoitzari jarraituz dagokien dokumentazioarekin batera:

• Aurkezteko era.

  Ahal den neurrian Internet bidez aurkeztu behar dira eskaera eta erantsi beharreko agiriak, horretarako sortutako eta aipatutako zerbitzuaren web orrian dagoen aplikazio informatikoaren bitartez (www.gipuzkoa.net/gazteria).

  Eskaeren eta horiei erantsitako dokumentazioaren aurkezpen telematikoa jarraian adierazitako arauan ezarritakoaren arabera egingo da: herritarren eta Gipuzkoako Foru Aldundiaren arteko internet bidezko harremanak arautzen dituen 2004ko maiatzaren 11ko 41/04 Foru Dekretua.

  Sinadura elektronikorik edo aurkezpen telematikorako baliozko beste egiaztatze modurik ezean, aplikazioaren bidez eskaera egiten duen erakundeak aplikazioak emango dion eskaera inprimakia aurkeztu beharko du, bere ordezkariaren sinadurarekin eta aurreko paragrafoetan aipatutako bitartekoren bat erabiliz. Bitarteko horren bidez nortasuna egiaztatu ondoren, aurkezteko data baliozkotzat aplikazio informatikoan erregistratutakoa hartuko da.

  Aurreko paragrafoan adierazitako inprimakia edo, kasua bada, eskaeraren dokumentazio guztia aurkeztu ahal izango dira Giza Eskubideetarako, Enplegurako eta Gizarteratzeko Departamentuko bulego nagusietan edo erregistroan (Donostiako Zarategi pasealekuko 99 zenbakiko behe eta seigarren solairuan, hurrenez hurren), Gipuzkoako Foru Aldundiko Erregistro Orokorrean (Donostiako Gipuzkoa enparantza z/g) edota 30/1992 Legeak, Herri Administrazioen Araubide Juridikoaren eta Administrazio Prozedura Erkidearenak, 38.4 artikuluan aurreikusitako moduetan.

  Paragrafo honetan erabakitakoa aplikagarri izango da, era berean, foru dekretu honen eranskinetako bakoitzaren arabera eska daitekeen dokumentazio zurigarria aurkeztu behar denean ere.

• Baimena.

Erakunde interesdunak eskaera aurkezteak eramango du berarekin baimena ematea Giza Eskubideetarako, Enplegurako eta Gizarteratzeko Departamentuari zerga betebeharretan eta Gizarte Segurantzakoetan egunean dagoela zuritzen duten agiriak eskatzeko; naimen hori ez bada eman nahi, espresuki adierazi beharko da eskaeran eta horrekin batera aurkeztu beharko dira dokumentu edo ziurtagiri horiek. 3.2.e) artikuluan ezarritakoarekin bat etorriz, aurreikuspen horiek ez zaizkie apikatuko Toki Erakundeek egindako eskaerei.

• Akatsen zuzenketa.

Eskaera orriak edo harekin batera aurkeztu beharreko agiriak osatu gabe daudela edota akatsen bat dutela ikusten baldin bada, akatsak zuzendu edo behar diren agiriak ekar ditzan hamar eguneko epea emango zaio eskatzaileari. Epe horren barruan horrela egiten ez badu, bere eskaera bertan behera uzten duela iritziko zaio, 1992ko azaroaren 26ko 30/92 Legeak, Herri Administrazioen Araubide Juridikoaren eta Administrazio Prozedura Erkidearenak, 42.1 artikuluan jasotakoaren arabera hartutako ebazpenaren bitartez.

5. artikulua.- Administrazioaren isiltasuna. Prozedura ebazteko epea.

• Foru Dekretu honetako eranskinetan azaltzen diren diru laguntzak emateko prozedurari dagokionez, balizko egintza administratiborik gertatzen bada ezespentzat hartuko da, horrela xedatzen baitu 1992ko azaroaren 26ko 30/92 Legeak, Herri Administrazioen Zuzenbide Arauei eta Administrazio Jardunbide Arruntari buruzkoak, 44. artikuluan.
• Lege horretako 59.6.b) artikuluan erabakitakoari jarraituz, lehiaketa bidez emango diren diru laguntzen deialdien ebazpenak Gipuzkoako Aldizkari Ofizialean argitaratuko da. Argitarapen horrek banakako jakinarazpena ordeztuko du eta jakinerazpena egintzat ulertuko da lege ondorio guztietarako hura argitaratu eta hurrengo egunetik aurrera. Jasota ez edukitzea ondorio horiek izateko oztopo izango ez bada ere, erakunde interesdunei ondoko bitartekoren baten edo batzuen bidez ere jakinaraziko zaie: ebazpena zerbitzuko web orrian sartuz (www.gipuzkoa.net/gazteria), edo posta elektronikoz, telefonoz, faxez... jakinaraziz.
• Behar diren ebazpenak eman eta argitaratu edo jakinarazteko gehieneko epea sei hilabetekoa izango da, eskaerak aurkezteko ezarritako azken egunetik aurrera kontatuta (edonola ere, epe hori gehienez ere urte bakoitzeko abenduaren 30ean amaituko da).

6. artikulua.- Zenbatekoaren muga.

Foru dekretu honetan erregulatutako diru laguntzen zenbatekoak, bakarka edota bestelako administrazio publikoen edo erakunde publiko nahiz pribatuen diru laguntza edo bestelako laguntzarekin batera, ez du inola ere onuradunak aurrera eraman beharreko jardueraren kostua gaindituko.

7. artikulua.- Aldaketak.

Diru laguntza emateko kontuan hartu diren baldintzetan edozein aldaketa gertatuz gero, eta nolanahi ere, oinarri hauetan baimendutako kasuez kanpo diru laguntza hauekin batera laguntzak jasoz gero, diru laguntza emateari buruzko ebazpena aldatua izan daiteke.

8. artikulua.- Dirua itzultzea.

• Jasotako diru kopuruak itzuli beharko dira, eta diru laguntza ordaindu zenetik itzulketa egin beharra erabakitzen den bitarteko berandutza interesak ordaindu beharko dira, hurrengo kasu hauek gertatzen direnean:
  • Diru laguntza eskuratzea horretarako ezarrita dauden baldintzak faltsutuz edo eskuratze hori galaraziko luketen baldintzak ezkutatuz.
  • Diru laguntza emateko oinarrian dagoen jarduera, proiektua edo jokabidea osorik edo zati batean ez betetzea.
  • Jasotako diru laguntza zuritzeko beharkizuna ez betetzea edo behar adina ez zuritzea, diru laguntza mota bakoitzaren berariazko oinarrietan xedatutakoaren arabera.
  • Foru dekretu honetako 9. artikuluan xedatzen den zabalkunderako bitartekoak jartzeko beharkizuna ez betetzea.
  • Indarrean diren legeetan aurreikusitako finantza egiaztatze eta kontroleko jarduerei aurre egitea, aitzakiak jartzea edo uko egitea, baita kontabilitate, erregistro edo dokumentu gordetze aldetik dauden beharkizunak ez betetzea ere, horrek ezintasun bat eragiten duenean diru laguntzaren erabilera egiaztatzeko, helburua bete den jakiteko, diruz lagundutako jardueren benekotasuna eta erregulartasuna ziurtatzeko, edo beste herri administrazioek edota erakunde publiko nahiz pribatuek, estatukoek, Europar Batasunekoek edo nazioartekoek xede berarekin emandako laguntza, diru laguntza, sarrera edo baliabiderik jaso ote den egiaztatzeko.
  • Administrazioak erakunde onuradunei ezarritako beharkizunak ez betetzea, edota haiek, diru laguntza ematerakoan, onartutako konpromisoak ez betetzea, diru laguntza emateko oinarrian izan ziren helburuak betetzeko, proiektua gauzatzeko, jarduera egiteko edota jokabidea aintzat hartzeko moduari dagokionean edo eragiten dionean.
• Emandako laguntzaren edo diru laguntzaren zenbatekoa, bakarka edota bestelako administrazio publikoen edo erakunde publiko nahiz pribatuen diru laguntza edota bestelako laguntzarekin batera, handiagoa denean onuradunak aurrera eraman beharreko jardueraren kostua baino, itzuli egin beharko da garatutako jardueraren kostuaz gaindiko diru kopurua.
• Itzuli beharreko zenbatekoak eskubide publikoko diru sarreratzat hartuko dira.

9. artikulua.- Publizitatea.

• Diruz lagundutako jarduerei buruzko informazio, iragarpen eta propagandan garbi adieraziko da Gipuzkoako Foru Aldundiaren laguntza eta haren logotipoa ikusteko moduan jarri beharko da. Logotipoak Gipuzkoako Foru Aldundiaren anagrama eta ondorengo testua eramango ditu: Gipuzkoako Foru Aldundia / Diputación Foral de Gipuzkoa Giza Eskubideetarako, Enplegurako eta Gizarteratzeko Departamentua / Departamento para los Derechos Humanos, el Empleo y la Inserción Social
• Lagundutako jardueraren inguruan, euskara gutxienez gaztelaniaren baldintza beretan eta maiztasun berarekin erabiltzen dela bermatu beharko da, ondoko gaietan: publizitatea, argitalpenak, ikastaroak, esku-orriak, diptikoak, oharrak,..., interneteko edukiak, agerpen publikoak, sortzen den materiala, etab.
• Hizkera ez-sexista erabiltzea ziurtatuko dute beren jakinarazpenetan, argitalpenetan, programetan, ikastaroetan, etab.

10. artikulua.- Interpretazioa.

Foru dekretu honetan onetsitako oinarriak interpretatzeko orduan sor litekeen edozein zalantza Gipuzkoako Foru Aldundiko Giza Eskubidetarako, Enplegurako eta Gizarteratzeko Departamentuak erabakiko du.

Xedapen gehigarria. 2006 urteari dagokion deialdia.

• Foru dekretu honetako eranskinetan jasotako laguntzak eskatzeko epeak ondoko hauek izango dira 2006. urtean:
  • I. eranskina: apirilaren 28ra arte
  • II. eranskina: apirilaren 28ra arte
  • III. eranskina: apirilaren 28ra arte
  • IV. Eranskina: ekainaren 30era arte
  • V. eranskina: urriaren 27ra arte
  • VI. eranskina: apirilaren 28ra arte
  • VII. eranskina: apirilaren 28ra arte
  • VIII. eranskina: ekainaren 30era arte
• 2006ko aurrekontu ekitaldiari dagozkion laguntzetarako 1.044.255,32 euros euroko gastua egiteko baimena ematen da, honako aurrekontu egozpenaren arabera:
  • 101.385,89 euro, 0810.100.481.00.03 kontutik, I. eranskineko laguntzetarako.
  • 51.278,00 euro, 0810.100.781.00.01 kontutik, II. eranskineko laguntzetarako.
  • 15.500,00 euro, 0810.100.481.00.02 kontutik, III. eranskineko laguntzetarako.
  • 51.500,00 euro, 0810.100.481.00.04 kontutik, IV. eranskineko laguntzetarako.
  • 420.800,00 euro, 0810.100.461.01.01 kontutik, V. eranskineko laguntzetarako.
  • 82.400,00 euro, 0810.100.481.00.01 kontutik, VI. eranskineko laguntzetarako.
  • 21.391,43 euro, 0810.100.481.00.02 kontutik, VII. eranskineko laguntzetarako.
  • 300.000,00 euro, 0810.100.761.01.01 kontutik, VIII. eranskineko laguntzetarako.
• Aurreko atalean baimendutako gastuen kopurua handitu edo txikitu egin dezake, aldaketaren zenbatekoaren arabera horretarako eskumena emana duen organoak.

Xedapen indargabetzailea.

Indargabetu egiten da 2005eko martxoaren 22ko 16/2005 Foru Dekretua, Giza Eskubideetarako, Enplegurako eta Gizarteratzeko Departamentuko haur, gazte eta boluntario gaietan diru laguntzak emateko oinarriak onartzen zituena.

Era berean, indargabetzen dira maila bereko edo beheragoko gainerako xedapenak ere, foru dekretu honen aurka dauden zatietan.

Amaierako lehen xedapena.

Giza Eskubideetarako, Enplegurako eta Gizarteratzeko Departamentuko foru diputatuari ahalmena ematen zaio foru dekretu hau zuzen gauzatu, interpretatu eta burutzeko.

Amaierako bigarren xedapena.

Foru dekretu hau Gipuzkoako Aldizkari Ofizialean argitaratzen den egunean sartuko da indarrean.

Donostia, 2006ko martxoaren 14a

Diputatu nagusia,

Izptua.: Joxe Joan Gonzalez de Txabarri Miranda.

Giza Eskubideetarako, Enplegurako eta Gizarteratzeko foru diputatua,

Izptua.: Mª Carmen Marin Guruceaga.